Sa sunod-sunod nga panghitabo sa Mindanao─pagbaha sa Cagayan de Oro, Negros Oriental, ug Iligan; ug ang pagdahili sa Compostella Valley─ akong nabati ang akong kabilinggan sa akong mga igsuon nga nabiktima ani nga mga trahedya.
Disyembre 16 pa lang, nabati na namo ang dili maayo nga panahon sa lugar. Sa kakusog sa hangin ug sa dili na halos maagian nga dalan tungod sa nag panaw nga tubig, ako kauban akong higala nagpabilin nga pas-ong sa Limketkai Mall. Nilabay ang duha ka oras ayha mi nakasakay kauban ang uban pang mga pasahero nga pila na pud ka oras naghulat. Sa akong pagtuo, tapsing ra ang bagyo dinhi sa Mindanao. Wala man jud nako naandan nga ang Mindanao, hilabi na ang Cagayan de Oro, direkta nga maapektohan sa mga bagyo tungod sa nagpalibot nga mga bukid niini nga nagsilbi nga sagang aning mga katalagman.
Apan sinugdan ra diay ni sa kalbaryo sa akong mga igsuon. Ala una sa Disyembre 17, Sabado, usa ka di rehistrado nga numero ang nanawag sa ako. Natingala ko pero tungod kay naisturbo ang akong pagtulog, suko ko nga nitubag nga “Hello? Kinsa ni?!” Wala na ko kasabot sa akong buhaton sa pagkadungog sa tingog sa akong suod nga amiga nga nag hilak ug nangayo ug tabang. Dali nakong gipukaw akong magulang ug akong amahan. Dakong malas pa gyud kay walay tubig ug brownout pa gyud sa among lugar. Gipadayon ug giilisan namo sila para pud maibsan ang ilang katugnaw nga nabati. Gawas sa among balay, aduna pay mga tawo nga malaomon nga naghulat ug hinabang. Tungod kay kami ra ang mata ato nga oras ug kay dili na namo makaya nga ipadayon sila sa among panimalay, amo na lang silang gihatagan ug mga bisti ug gihatod sa court para didto na pud sila mag puyo hangtod muhinay ang ulan.
Adtong adlawa pud, naka skedyul ang parti sa among grupo. Ang akong kahinaman nailisan ug kasub-anan ug pagkayugot. Apan dili man namo kontrolado ang panahon, amo na lang gipili nga ikansel ang parti ug ihatag among mga giandam nga premyo sa mga bata para na pud magsilbi nga pahalipay sa ila karong pasko. Dako pud akong kalipay sa pagkahibalo nga ang parti sa Xavier University gikansel pud ug ang tanan nga pagkaon ug badyet para sa parti gi donar sa mga biktima. Dili lang kini ang nagpahimuot nako. Imbes na masalimuot nga pag selebrar sa pasko, nakita nako nga niadtong panahona natagamtaman sa matag usa ang tinuod nga spiritu sa pasko. Mao kini ang da best pasko kay:
1. Nahimo kining dalan para magkailhanay ang matag-usa. Ang mga tawo nga di kayo hilig makig-uyon sa iyang mga igsuon nakatuon ug atiman sa mga estranyo. Ang mga tawo nga nalampas ang balay nakatuon usab ug puyo kauban ang uban pang mga biktima diin dili lamang bag-ong panimalay ilang natukod diha sa mga evacuation center kundili apil na pud ang panaghinigalaay.
2. Ang katalagman nahimong dalan para maghimugso pag usab ang spiritu sa Bayanihan. Ang panghitabo nahimong agianan para ang dugay nang nawagtang nga spiritu sa Bayanihan magmugna pag-usab. Tanan, apil ang mga biktima, nag tabang-tabang aron ma salbar ang mga kinabuhi ug mga butang sa mga biktima.
3. Ang panghitabo nagtudlo sa ato ug leksyon nga hatagan ug bili ang kinabuhi ug ampingan pa ang kalikopan. Ang katalagman nagsilbi ug pahinumdom sa mga tawo sa sugo sa Ginoo. Silbi magbalantay sa iyang mga minugna, obligasyon sa matag usa ang pag amping sa iyang mga igsuon ug iyang kalikopan.
4. Ang panghitabo nagpalig-on sa atong pagtuo sa Ginoo. Base sa mga interbyew ug sa mga nakita nako nga mga litrato nga nagkalat sa internet, di nako malimod ang dakong pagsalig sa atong mga igsuon sa atong Ginoo. Matud pa sa usa ka survivor nga lumulupyo sa Tibasak, katong kadlawon nga anaa sila sa atop sa ilang panimalay, ang ilang gakadunggan lang kay mga pag-ampo ug mga awit nga pagdayeg sa Ginoo.
5. Tungod niini, daghan ang mga natawo nga bayani dili lamang dinhi sa Pilipinas kundili apil na pud sa ubang kanasuran. Niadto pa lang Disyembre 17, sugod sa pag tabang-tabang sa pag salbar sa mga kinabuhi, wala nay undang ang pag abot sa mga gasa para sa mga survivor. Matud pa sa usa ka survivor, tungod sa kadaghan sa hinabang nga ilang gakatagamtaman, sa usa ka adlaw, aduna silay matigom nga kulang-kulang baynte ka kilo sa bugas ug usa ka karton sa noodles.
6. Ug paagi aning panghitabua, napabati sa matag-usa ang tinuod nga spiritu sa pagpakatawo sa Ginoo. Niadtong niaging mga pasko, atong naandan ang panagsukliay ug regalo or exchange gift diin ang matag usa kay gikinahanglan nga muhatag ug regalo sa iyang manito or manita. Apan karong pasko, ang mga tawo nakatuon ug paghatag bisan pag halos mahurot na ang ilahang panag-iya.
Mao kini ang nagpa kwalipikar sa Disyembre 25, 2011 para akong matawag nga da best pasko dinhi sa CdeO. Nawad-an man tag mga butang ug mga igsuon, sukli ani ang mga langitnong bili nga lugusa natong mahimamat dinhi sa materyalistikong kalibutan. Ang naka guol lang kay ang kamatuoran nga kailangan pa nato muagi ani nga katalagman para matagamtaman ang tinuod nga spiritu sa pagpakatawo sa atong manunubos.
No comments:
Post a Comment