PYF: Kalihukan para sa mga kabatan-onan

Niadtong Nobyembre 26-27, ang mga kabatan-onan sa nagka lain-laing parokya sa Aluba nagkahiusa sa Immaculate Concepcion Parish, Aluba, Macasandig para isaulog ang Parish Youth Festival (PYF) 2011 sa tema nga “I am the vine and you are the branches.”

Ang maong kalihukan gisugdan sa alas syite sa buntag sa pagpahina diin ang mga kabatan-onan nanglimpyo sa lugar isip pagpangandam sa ilang puy-anan sa sulod sa duha ka adlaw. Gisundan usab kini sa animasyon diin manayaw ang tanan para ipaabot ang ilang paghigugma sa Ginoo. Nagpa ila-ila usab ang matag partisipante nga mitambong sa kalihukan. Ang mga parokya nga mi partisipar sa aktibidad mao ang Arroville, Melecia Homes; Aluba; Buena Oro; Sto Niño, Buena Oro; Sto Niño, Mandumol; Taguanao; Indahag; ug Upper Calacapan. Sa gabii, nag tipok-tipok ang tanan sa simbahan para sa Taize prayer, usa ka mahilom nga klase sa pag-ampo, uban sa mga seminarista sa Sacred Heart of Jesus. Pagka alas diyes traynta sa gabii, gi sugat ni Rev. Fr. Marcial C. Aguirre, SCJ, Parish Youth Spiritual Director, ang tanan sa iyang simple nga mensahe. Naghatag usab ug mensahe si Rev. Fr. Janusz N. Burzawa, SCJ, Parish Priest. Sa iyang mensahe, gi emphasize niya ang importansya sa mga kabatan-onan sa paglambo sa simbahan ug ang pag-abli sa mga kasing-kasing para sa Ginoo aron magmalipayon ang tanan sa umaabot nga pasko.

Ang tumong niining PYF mao ang pagdasig sa mga kabatan-onan, labi na katong mga nahilayo sa pagserbisyo sa simbahan, nga mapaduol sa pagdayig sa Ginoo. Si Fr. Aguirre, sa usa ka interbyew, gipakita ang iyang kaguol sa kagamay sa nagtambong sa kalihukan. Sa iyang istorya mahitungod sa tema, iyang gikumpara ang mga kabatan-onan sa usa ka sanga nga napahilayo sa lawas sa kahoy nga ang Ginoo, tungod sa teknolohiya. Matud pa niya, pipila na lang ang gaapil sa simbahan tungod niini. Dugang pa sa usa ka youth leader, “gamay ra ang niuban kay bisi na ug ang uban di pud tugtan.” Dugang pa niya, lisod hanggaton ang uban labi na katong mga nahilayo sa simbahan. Kadaghanan daw sa iyang nadasig kay ang mga kabatan-onan nga daan ng aktibo sa simbahan. Ingon pud niya, ang problema sa kalihukan kay ang kakulangan sa badyet sa simbahan. “Mas daghan maaghat kung naay pang attract sa kabatan-onan. Dinhi kay naa pay registration nga 20, di pa jud libre ang pagkaon. Unta sa sunod, lahion na ang proseso,” iyang giingon nga nay pagka suko nga tono. Pero matud pa niya, ang kalihukan maayo kay dili lang puro istorya ang mahitabo kundili naa puy mga hugada para malingaw ang mga kabatan-onan.  

Ang maong kalihukan natapos nga hapsay ug malampuson. Bisan pa ug gamay ra ang mitambong niini, kompara sa niaging mga youth festival, nanghinaut japon si Fr. Aguirre nga ang aktibidad mahimo untang instrumento para sa mga batan-on para mag serbisyo sa Ginoo.